In t veuren binnen zeuven doagen
n haile weke. Bie t bedrieven
vlaigen ze toerloos deur en hen,
kinnen gain stilstoan of verblieven.
En achternoa gloept gusterdag
ain gloazeg en verwoazend an.
Mie blift gain tied veur kurenturen:
in körts bin ik de minderman.
Wat komen zel, kin ik nait waiten:
dit levent runt verropt kepot.
Ik stel de wekker op haalf zeuven
en joag de tied mit dreumen vot.
Haarm Diek (ps. J.D. Plenter, Groningen, 1921-2005)
Uit: Krödde nr. 41, 1992.
