Zien groot swoar heufd veurover,
Swaart-zoad veur gòlden tover,
Zugt men, hoog boven hege,
De Zunnebloum.
De haarst spint foaliedroaden:
Aan Zunnebloum zien zoaden
Pluustert en plokt n vogel –
O, Zunnebloum.
Moar doch: trankiel en krachteg,
zien zunnezang indachteg,
Blift hai n stoareg heerschop,
Ons Zunnebloum.
Wordt òns geslacht in d’ òlder
Voak seupel en veul kòlder –
Zo nait dat beeld van weelde,
Dij Zunnebloum!
Tjaard W. R. de Haan (Den Haag 1919 – Oegstgeest 1983)
Uit: Dörp en Stad (1961). Voor meer Grunnegs: www.cgtc.nl
