Voor de maandelijkse informatiekrant in Usquert genaamd DEVO schrijft Fieke Gosselaar verhalen over schiere woorden van de Grunneger toal oet de K. ter Laan. Voor de februari-editie legt ze uit wat het woord JOEGEL betekent.
Moi! Sunt t veurjoar van 2023 gloeit der weer licht in t Berlagehoes. t Is t nije ketoor van Erfgoedpartners en t Centrum Groninger Taal & Cultuur. Soamen prebaaiern zai zo veul meugelk opmaarken te kriegen veur t materieel en immaterieel erfgoud van de pervinsie Grunnen. Mien noam is Fieke Gosselaar en ik bin aan t waark as streektoalconsulent. En in de kommende tied schrief ik veur de DEVO over de schiere woorden van de Grunneger toal oet de K. ter Loan dij noar mien mainen wel in de schienwerpers mogen stoan!
n Leutje opmaarken doarbie is dat t wezen kin dat joe sums denken: dat is nait Hogelands. Dat kin! Ik kom oet t Oldambt, mor bin van mainen dat t Grunnegs veur elkenain goud te lezen is, ook mit klaaine accentjes dij misschain even aans binnen. Ik hoop dat joe mien leutje verhoal waarderen kinnen.
t Eerste woord is: JOEGEL = slechte thee en kovvie
“Harregat, wat haar ze slecht sloapen. Haile nacht was ze aan t prakkezaaiern west over haildaal niks! Ze bleef mor wakker. Ze haar zoch ofvroagd wat der eerder was: t wakker blieven of aal dij male gedachten dij heur wakker holden? Ze was bèrre oetstapt en haar t roam oetkeken toene in. t Leek asof ze dreumde. In t licht van de moan zat buurman in zien pyjama in t gras noar boven te kieken. De steerns vörmden n steelpannetje en t was asof der stoom vanoet dat pannetje kwam. Nijsgiereg bleef ze toukieken en zag hou buurman zien kopke omhoog haar en hou t pannetje hoog in de hemel n beetje schaif hong. Persies in t kopke kwam n stroal dampende prut. Buurman nam n dikke slok en spijde t vot weer oet. ‘Wat n joegel!’ ruip hai. ‘Ik lus dij joegel nait!’ Doarnoa zat ze liek op in heur bèrre.”
