Nooit zien we hum versnellen.
Ieuweg weer die zachte brede slag
uutzied, twee troage vegen dag
aan dag de tied opnij vertellen.
Eerder nog n slome dukeloar
zo dodeg vroren bij de sloot,
want bij gien zun de ogen toch groot,
moakt hum n schiere kunstenoar.
Nog pril et stel dat vleugelkust.
Mor zoete wien brengt met gemak
vlugge trouwpartijen aan t licht.
De diepste wens groeit uut tot n plicht
Het blode nust groeit tak veur tak
tot n wieg woarien de zegen rust
Reinder Willem Hiemstra (Niezijl, 1943). Uit Krödde nr 101, 2007.
Bio Reinder W. Hiemstra.
Elke week wordt der n gedicht kozen oet 200 joar Grunneger poëzie. Touglieks zel dit gedicht publiceerd worden ien t Dagblad van het Noorden, dinsdags op de pagina Grunnegs Goud.
