Woar blifstoe, Muze, dast hailtied vergetst,
te proaten van doar doe zo staark in bist?
Dast hail die kracht op minne zoaken zetst,
dien vuur op dat wat weerde en aanzain mist?
Kom weer, onnutte Muze, deur den dag
mit edel waark, wat of ook tied verdee;
zing t oor aan dat dien laidjes lieden mag:
dat brengt dien redenriekdom weer op glee.
Opstoan doe, luie Muze, kiek es aan:
mien laifdes laif gezicht; of trekt doar tied
ain leutje vòltje in, speul doe pootaan
mit spotternij, laag wat hai knooit aan zied.
Geef doe mien laifde d’eer, wees tied veuroet;
hòl hom zien saais en kromme mesk van d’hoed.
William Shakespeare (Stratford-upon-Avon 1564 – 1616) & Nina Werkman (Bellingwolde 1947) Uit: Woar blifstoe, Muze (Uitgeverij Vliedorp 2019)
