Gedicht van de Week van Jan Iden

Vervoaren

Aalvot nog beelden
van stoense klaai,
onrusteg trillend
in glinne zun
of groeterg graauw
in slichte regen.

n Stieve wind
goandeweg golvend
deur de gaarst
of t volk bie pad
krom over t stuur
mainsttied integen.

Verruild is klaai
veur t Drintse zaand
en nij oaventuur.
Onzeker wis
worden d’olle beelden
aan n kander swegen.

Jan Iden (Froombosch 1930 – Appingedam 2016)
Uit Krödde nr. 43, 1992