t Joar 2020 was n joar woarin alles aans was as aans.
Drok mit t veurberaaiden van n nije editie van de Dag van de Grunneger toal in t Forum, kwam doar t virus opzetten. Twij doagen veur t Grunneger feestje dat wie organiseren zollen, wör dudelk dat t nait deurgoan kon. t Laand en zulfs ons kantoor ging op slöt. Veur ons was t even wennen vanzulf, thoes waarken en kieken wat ter nog wel meugelk was, mor wie konden der nog wat van moaken. Wie gingen op zuik noar alternatieven. Op Facebook wör der mit Grunneger muzikanten, schrievers en dichters n nij item moakt en oeteindelk kwam der zulfs n digitoale variant van de Dag van de Grunneger toal. Veur n haile bult andern was t veul stoerder. Theaters mossen dicht, poppodia, cafés, alles ging op slöt. Muzikanten kwamen mit troostlaidjes, dichters schreven over t nije leven, mor zunder publiek was en is t toch dudelk aans as aans.
Nou, aan t end van dit biezundere joar, is der weer n nije ‘lockdown’ (hebben we doar al n Grunneger woord veur?) en optredens, zulfs veur datteg personen, kinnen nait deurgoan. t Joar ofsloeten vuilt doarom nait zo feestelk as t mainstieds vuilt. Aan ander kaant, veul minder kin t nait worden. Loaten we hopen dat 2021 weer n joar wordt mit veul (fysieke) Grunneger evenementen, optredens en veurdrachten. Wie mouten nog even deurzetten. Dat kinnen wie as Grunnegers ja as gain aander. Loaten we dus hopen dat we nkander in 2021 weer zain goan en dat we din mit n laag weerom kieken op n joar dat aans was as aans.
Wie wìnsen elk goie kerstdoagen en ontzettend veul zegen veur t ankomend joar. Hol kop ter veur!
Olaf Vos, Henk Scholte en Patricia Ottay
Coördinator en consulenten van CGTC
Het CGTC kantoor is gesloten van maandag 21 december tot maandag 4 januari.
