t Schemert en dreum het mie verloaten
stilte van duustern is no veurbie.
Ik dwoal weerom duur nait te kieken
onwis dat k vandoag ientegen kom.
Wat is t dat vrouger mie loat stoaren
noar zolder en kroezen ien t behang
onbewegelk t gemoud aan poazen.
En maank herinnerns zai ik vernijs
t geluk ien beeld van aal dij joaren.
Mor no zol ik mie stoadeg moanen
n daag zo vris en nog gain zörgen
woarom dij wenst, ik zol bedoaren.
Ien schaar van guster nuigt gruiend licht
t verleden ien sloap op pad noar mörgen.
Jan de Jong (Tjamsweer, 1951). Uit: Wat mörn komt, deze verzamelbundel kwam uit in 2011 en werd weggegeven tijdens de Dag van de Grunneger toal.
