k Wol die zain
onder mien leste loakens
as op ons eerste dag.
k Kon die zain
deur roamkes van autometiek:
doe achter kroketten,
ik der veur. k Wos nog nait
of k frikandellen wol of nasibalen.
Doe daanste mit mie mit.
Dien ogen, wos k, was aal wat k wol.
Achter t dubbel glas bist bleven.
Noa al dij joaren slutstoe
mien leste loakens tou.
Rieks Holtkamp (Zuidlaren, 1950). Dit gedicht staat op ‘Oader’. Grunnegs literair tiedschrift.
