Op 4 december 1974 is Stichting t Grunneger Bouk opricht. Ain van de initiatiefnemers was Jan Groenbroek en hai zet hom nog altied in veur Stichting t Grunneger Bouk en veur de haile Grunneger toal en cultuur. t Idee was en is om t oetbrengen van Grunnegstoalege bouken te bevorderen.
De belangriekste en bekendste oetgave van Stichting t Grunneger Bouk is t tiedschrift Toal en Taiken, t tiedschrift dat tegenwoordeg vaaier moal in t joar verschient (eerder zulfs zes moal in t joar). t Is n tiedschrift mit biedroagen over Grunneger cultuur, toal, geschiedenis en literatuur. Schrievers zo as Reinder Willem Hiemstra, Henk Puister en Jan Siebo Uffen sturen heur verhoalen of gedichten geregeld in en die verhoalen en gedichten worden lezen deur de roem 1800 abonnees.
t Ofwisselnde karakter moakt dit tiedschrift hail leesboar; denk bv. aan t waark van Willem Friedrich, Jan Oldenhuis, Jur Engels en Jan Mulder. Of denk bv. aan de interviews mit muzikanten of schrievers. In elk nummer wordt Grunneger nijs meld, zo as t oetkommen van bouken over Grunnen. t Tiedschrift Toal en Taiken is intussen al 42 joar van belang!
Ook wordt elk joar t “Begunstegersbouk” oetgeven, woarvan t viefstegste schreven wer deur Ingeborg Nienhuis: Levende Legende, n Grunneger Odysee. t Bouk won tiedens ‘Het Beste Groninger Boekenfeest 2024’, organiseerd deur Noordwoord, de Beste Groninger Boekenclub Pries. En t is oardeg om te waiten dat t veurege “Begunstegersbouk” van Nienhuis verfilmd wordt en in 2025 dus ook te zain is; dus kieken we oet noar de film: Schoem of de voarende Zoltkamper.
Aan t ende van dit joar verschient t verzoameld waark van Dr. Jan J. Boer as t nijste “Begunstegersbouk”. Mor of dit nou echt de leste oetgoave wordt, tja, de tied zel t leren…
In elks geval wait Stichting t Grunneger Bouk al viefteg joar interessant waark te publiceren en perbaaiert zo schrievers te motiveren. Der zitten in de indrokwekkende stoapel “Begunstegersbouken” biedroagen van schrievers as Harm van der Veen, Kunny Luchtenberg, Jan de Jong, Simon van Wattum, Gré van der Veen, Jan Iden, Wia Jager enz.
Stichting t Grunneger Bouk het n oetgebraaid documentoatsiecentrum mit meziek en mit bouken en tiedschriften over de wereld aan Grunneger onderwaarpen. Dit alles is te vinden in t Groninger Cultuurcentrum, Stationsstr. 11b in Scheemde.
Vanzulf is t winnen van de K. ter Laan pries n haile eer, t is de culturele pries dij alle twij joar oetriekt wordt deur Stichting t Grunneger Bouk. De mooie liest van winnoars let zain houveul schiere initiatieven der op t haile gebied van t Grunnegs nomen worden. De eerste winnoars waren in 1985 Lianne Abeln en David Hartsema, mor ook theatergroep WAARK het hom kregen. En nog nait zo laank leden vielen oa. Marcel Hensema en Bert Hadders in de priezen. Van t joar kreeg schriever / dichter Henk Puister de K. ter Laan pries.
As joe wat waiten willen over Grunneger meziek, schrieverij, geschiedenis of nuim mor op – kom den noar Scheemde. De kovvie stait veur joe kloar in dizze erfgoudbibliotheek. Kom en verboas joe over dizze grode verzoameln van viefteg joar Stichting t Grunneger Bouk!!
